Konsultan (Operasaun, Manutensaun no Jestaun ba bee iha area rural) - WaterAid Timor-Leste

Termu Referénsia ba Konsultán

Aprendizajen husi tinan sanulu suporta operasaun, manutensaun no jestaun ba bee iha área rurál

 

Sumáriu

WaterAid buka konsultán ka grupu konsultán, atu apoia halibur no dokumenta aprendizajen husi tinan sanulu suporta operasaun, manutensaun no jestaun ba bee iha área rurál.

Kontestu

Iha Timor-Leste kuaze 73% uma kain iha área rurál asesu ba atendimentu bee ne’ebé melloradu iha tinan 2017.[1] Fornesimentu bee iha área rurál nu’udar responsabilidade Ministériu Obras Públikas nian liu husi Direção Geral de Água e Saneamentu (DGAS). Funsionáriu husi DGAS iha kada munisípiu apoia atendimentu bee iha komunidade liu husi Grupu Manajamentu Fasilidades (GMF).

 

Hanesan iha rai sira seluk, sustentabilidade depois de konstrusaun sistema bee hanesan asuntu importante iha Timor-Leste. Funsionamentu ba sistema bee hotu iha Timor-Leste susar atu hatene maibé peskiza ida hatudu katak tinan ida depois de konstrusaun[2], sistema bee 30% de’it mak funsiona. Atu ajuda DGAS (agora BTL, E.P.) responde ba dezafiu sustentabilidade, WaterAid suporta GMF sira atu kria Asosiasaun GMF (AGMF) iha Munisípiu Liquiçá, iha tinan 2010, no iha Munisípiu Manufahi, iha tinan 2014, nu’udar organizasaun sombriña (umbrella organisation) ba GMF sira iha munisípiu rua ne’e. AGMF sira servisu hamutuk ho funsionáriu DGAS (uluk) no SMASA nian hodi suporta GMF sira iha atividade hanesan monitorizasaun, kapasitasaun no jestaun. WaterAid iha komitmentu longu prazu atu profesionaliza AGMF sira.

 

Dezde harii AGMF WaterAid suporta AGMF liu husi dalan finanseiru, tékniku no mós kapasitasaun. Agora daudaun AGMF servisu maizumenus independente husi WaterAid maibé simu fundus nu’udar parseiru. Iha enkontru ka diskusaun autór bee sira iha Munisípiu inklui governu munisípiu, komunidade no GMF rekoñese kontribuisaun AGMF ne’e di’ak no peskiza simples iha 2017 indika evidénsia uitoan katak AGMF nia servisu kontribui ba funsionamentu sistema bee.[3] Maibé to’o agora seidauk iha dokumentasaun kompletu kona ba kontribuisaun AGMF ba sustentabilidade atendimentu bee iha área rurál durante tinan sanulu nia laran. Tanba ne’e mak WaterAid buka konsultán atu ajuda halibur evidénsia, analiza no dokumenta aprendizajen husi AGMF nia kontribuisaun ba operasaun, manutensaun no jestaun bee.

 

Aprendizajen ne’e sei kontribui ba estratéjia AGMF no WaterAid iha Munisípiu rua. Bele mós ajuda setór bee ne’ebé agora muda hela. Iha fulan Janeiru tinan 2021 Governu Nasionál kria Empreza Publika Bee Timor (BTL), no mós Autoridade Nasionál Agua no Saneamentu (ANAS) ne’ebé sei kaer responsabilidade ba atendimentu bee ba oin maski sei fokus uluk ba área urbanu. Iha tempu hanesan programa PARTISIPA ne’ebé suporta Programa Nasionál Dezenvolve Suco (PNDS) sei hanaruk tan tinan 9. PNDS konstrui no halo operasaun no manutensaun ba sistema bee iha suco balun.

Objetivu Atividade

Atividade atu dokumenta aprendizajen ne’e iha objetivu rua hanesan:

1. Halibur no dokumenta perspetiva husi autór oi-oin kona ba susesu no dezafiu ne’ebé afeta liu ba sustentabilidade atendimentu bee iha Munisípiu Liquiçá no Munisipiu Manufahi. Nomós identifika papél no kontribuisaun AGMF iha susesu no dezafiu sira ne’e. 
2. Identifika no dokumenta aprendizajen kona ba sustentabilidade ba bee husi WaterAid no AGMF nia servisu durante tinan sanulu. Aprendizajen ne’e sei uza hodi:

a. Informa planu no apoiu ne’ebé mak AGMF no WaterAid sei fornese iha futuru.

b. Kontribui ba dezenvolvimentu estratéjia AGMF.

Knaar Konsultán

Ami espera konsultán nia knaar sei hanesan:

• Revee dokumentu, relatóriu no estudu kazu kona ba atendimentu bee iha Timor-Leste durante tinan 10 nia laran
• Analiza dadus kuantitativu ne’ebé eziste ona kona ba GMF no sistema bee nia funsionamentu no identifika pola, tema no ezemplu susesu
• Apoia ekipa WaterAid atu halo planu, fasilita no halo dokumentasaun ba workshop iha Munisípiu Liquiçá no Manufahi atu halibur perspetiva kona ba dezafiu no susesu ba atendimentu bee nia sustentabilidade no inklui mós kontribuisaun AGMF nian.
• Halo entrevista no diskusaun ho komunidade 10-12 atu kria estudu kazu ne’ebé fó ezemplu ba aprendizajen
• Hakerek relatóriu (pájina 10-20) iha lian Tetun ne’ebé fó sumaríu aprendizajen ba autór bee iha nivel nasionál nomós nivel munisípiu
• Aprezenta aprendizajen iha sorumutu bee iha nivel nasionál nomós nivel munisípiu iha Liquiçá no Manufahi

Ekipa WaterAid sei suporta operasaun, koordenasaun no logistic ba atividade iha leten.

Kualifikasaun no esperiénsia

Konsultán ne’ebé selesionadu, ka grupu konsultán sira, tenke:

• Iha skill no koñesimentu fasilitasaun ne’ebé forte, liu-liu atu fasilita sorumutu no workshop ne’ebé partisipativu.
• Iha esperiénsia liga ho governu nasionál no munisipiu nomós ho sosiedade sivíl.
• Iha esperiénsia halo revizaun literatura.
• Iha skill no esperiénsia halo análize kualitativu no kuantitativu (ezemplu ho Excel).
• Iha koñesimentu natoon kona ba atendimentu bee iha área rurál iha Timor.
• Demonstra kapasidade hakerek no ko’alia lian Tetun

Di’ak liu konsultán kaer kualifikasaun iha dezenvolvimentu komunidade ou tékniku sivíl no idráuliku.

Ezemplu Oráriu

Atividade	Responsabilidade	2022
		Maiu	Juñu	Jullu	Agus	Set
Rekruta konsultán	WaterAid	X
Konsolida no analiza dokumentu no dadus ne’ebé eziste ona	Konsultán		X
Workshop iha nivel munisípiu (depende ba limitasaun COVID-19)	Konsultán nomós WaterAid		X	X
Vizita no entrevista iha komunidade	Konsultán nomós WaterAid		X	X
Hakerek relatóriu	Konsultán			X	X	X
Enkontru atu fahe aprendizajen ba autór setór sira hanesan: Nasionál: BTL, DGAS, PNBESI-TL, PNDS/PARTISIPA, WaterAid, UNICEF Munisípiu: AGMF, Administrasaun Munisípiu, WaterAid,	Konsultán nomós WaterAid				X	X

 

Produtu

Produtu ne’ebé ami espera konsultán sei prodús inklui:

 

Produtu	Objetivu	Se mak sei uza rezultadu (primeiru)?	Se mak sei uza rezultadu (segundu)?
Relatóriu aprendizajen suporta atendimentu bee iha área rurál Pájina 10-20 (lian Tetun)	Dokumenta aprendizajen husi tinan sanulu suporta operasaun, manutensaun no jestaun ba bee iha área rurál inklui kontribuisaun AGMF.	Governu nasionál no munisípiu AGMF sira Setór bee Timor-Leste WaterAid	Doadór no organizasaun ne’ebé fó fundus ba atendimentu bee

 

Jestaun atividade

Pontu fokál primeiru ba atividade ne’e iha WaterAid Timor-Leste	Pontu fokál segundu ba atividade ne’e iha WaterAid Timor-Leste
Naran: Joraida Guterres Pereira Pozisaun: Policy and Campaign Officer Email: joraida.pereira@wateraid.org.au	Naran: Antonio do Rosario Pozisaun: Program Director Email: antonio.rosario@wateraid.org.au

 

Ami espera orsamentu totál ba konsultán ka grupu konsultán atu halo atividade refere maizumenus US$5,000 – US$8,000.

 

WaterAid hanesan organizasaun ida ne’ebé seguru ba labarik sira. Ami rekoñese katak ami tenke atende komunidade nia espetasaun no fiar ne’ebé fó mai ami nia ema sira atu mantein padraun ida ne’ebé aas ba kódigu konduta labarik nian. Tan ne’e, pozisaun hotu iha WaterAid obrigadu atu kumpre Polítika Protesaun Labarik nian no Kódigu Konduta.

WaterAid komprometidu ho protesaun kontra esplorasaun no abuzu sexual iha buat hotu ne’ebé ami halo. Valór no padraun sira ne’ebé mak ami defende hakerek hotu iha ami nia Kódigu Konduta Globál. Konsultan obrigadu atu kumpre Kódigu Konsulta Global ne’ebé mak iha.

Atu aplika

Ema interese atu aplika tenke manda proposál ne’ebé inklui:

1. Proposál pájina ida ne’ebé hatudu katak ita boot komprende atividade no knaar konsultán nomós indika katak ita boot kaer kualifikasaun refere.
2. Oráriu no orsamentu detalladu
3. CV ba konsultán ka grupu konsultán ida-idak

 

Halo favór manda proposal ba Joaninha timorlestejobs@wateraid.org.au antes, tuku 5:30PM, 25 Maiu 2022. Favór inklui ‘Aplikasaun: Aprendizajen ba atendimentu bee iha área rurál’ nu’udar títulu email.