National Consultant for Film Production - Oxfam iha Timor-Leste

Oxfam iha Timor-Leste
Projetu Indústria Estrativa (Extractive Industries Project)

Termu da Referénsia
(T&R)

Introdusaun
Timor-Leste nia estrutura ekonomia maioria depende makaas ba osan ne’ebé mai husi Fundu Petrolíferu, to’o oras ne’e governu simu ona mais ou menus 98% reseita husi kampu mina no gas ne’ebé Timor-Leste iha la inklui Greater Sunrise. Daudaun ne’e kuaze gastu hotu depende ba rezerva husi Fundu Petrolíferu ne’ebé iha hodi finansia estadu nia atividade sira.

Ita hotu hatene katak Timor-Leste iha riku soin mina no gas ne’ebé limitadu tebes no sei la dura ba tempu naruk bainhira governu ka polítiku na’in sira la jere ho kuidadu hodi investe ba iha setór na’un petrolíferu ka setór produtivu sira.

Projetu Indústria Estrativa (Extractive Industry) nudar projetu ne’ebé finansia husi Oxfam Estadus Unidus hodi foka ba programa kampaña no edukasaun públiku ne’ebé sei mobiliza no haforte lian oin-oin husi organizasaun sosiedade sivíl, grupu feto sira iha area rural, ema ho defisiénsia inklui aliadu no parseiru estratéjiku sira hodi influensia prosesu polítika governu no polítika na’in sira nian kona ba oinsá atu mantein utiliza Timor-Leste nia Fundu Petrolíferu ho kuidadu, halo diversifikasaun no halo investimentu iha setór produtivu sira.

Aleinde ne’e projetu Indústria Estrativa mós sei halibur parseiru sira hodi kontinua amplifika liu tan lian oin-oin iha servisu kampaña nian no oinsá haforsa liu tan abilidade atu influensia programa governu nian liu husi prosesu preparasaun Orsamentu Jerál Estadu 2022, hodi tau prioridade ba setór produtivu sira, nune’e bele garante sustentabilidade iha tempu naruk.

Maski daudaun ne’e estadu Timor-Leste enfrenta hela situasaun propagasaun COVID-19 ne’ebé iha impaktu makaas ba ekonomia povu ki’ik sira liu-liu grupu vulneravel sira hanesan feto ema ho defisiénsia no mós grupu joven sira nia atividade iha setór agrikultura, inklui mós servisu setór informal sira seluk ne’ebé maioria envolve povu ki’ik sira durante situasaun propagasaun COVID-19.

Atu hatene kle’an liu tan informasaun sira kona ba dezafiu sira ne’ebé grupu vulneravel sira ne’e enfrenta iha sira nia moris loron-loron no hatutan sira nia lian ba governante no polítiku-na’in sira relasiona ho setór agrikultura no setór produtivu seluk,

Oxfam hakarak servisu hamutuk ho konsultór ne’ebé iha abilidade no kualifikasaun di’ak atu produz filme badak ho durasaun tempu mais ou menus minutu 2, produz vídeo Anúnsiu Servisu Públiku ka Public Service Announcement (PSA) ho mensajen xave oin-oin husi grupu feto agrikultór sira, ema ho defisiénsia, grupu joven sira, akademia inklui mós Organizasaun Sosiedade Sivíl. Vídeo PSA sira ne’e sei utiliza atu informa ba públiku no polítika na’in sira kona-ba oinsá atu utiliza Fundu Petrolíferu (FP) ho sustentavel. Alende ne’e enkoraja polítika na’in sira fó importánsia ba diversifikasaun ekonomia liu-liu setór agrikultura no setór produtivu sira seluk.

Objetivu ba Produz TV Magazine no Anunsia Servisu Públiku (PSA)
Objetivu ikus servisu kampaña ida ne’e mak bele influensia governu hodi uza FP ho sustentavel no kontinua influensia mós sira nia planu, estratéjia, polítika, no desizaun sira hodi hasae investimentu iha setór agrikultura no setór produtivu sira seluk liu husi planu orsamentu anuál hahú husi Orsamentu Estadu 2022. Alende ne’e enkoraja governu hodi kontinua fó importánsia ba grupu sira ne’e nia partisipasaun iha setór agrikultura no setór produtivu no konsidera sira nia lian iha prosesu planu dezenvolvimentu, dezenvolvimentu estratéjia, planu no ezekusaun orsamentu estadu hodi fó importánsia liu-tan ba diversifikasaun ekonomia iha Timor-Leste.

Konsultór/a nia responsabilidade:
1. Prepara TOR ka synopsis kona ba istória ne’ebé atu produz tuir matadalan no polítika Oxfam iha Timor-Leste nian, uza mós linguajen sensitivu ba ema ho defisiénsia no tenke hetan aprovasaun husi Oxfam.
2. Filme sira ne’ebé sei produz mak hanesan:

• Mensajen xave ba kampaña no advokasia nian PSA hamutuk tolu (husi toos na’in ka agrikultór ida, grupu feto, grupu joven no reprezentante Sosiedade Sivíl.
• TV Magazines tolu ho durasaun minutu lima, reprezenta ema husi Governu, Parlamentu Nasionál, Organizasaun sosiedade sivíl, akadémiku, inklui mós ema ho defisiénsia, feto agrikultór ida kona ba sira nia esperiénsia liga ho investimentu FP iha setór agrikultura no setór produtivu seluk no saida governu tenke halo atu garante sustentablidade FP.

3. PSA no TV Magazine sira ne’ebé temi iha leten ninia mensajen xave sira sei foka liu ba asuntu sustentablidade Fundu Petrolíferu no diversifikasaun ekonomia ne’ebé foka ba Investimentu iha setór agrikultura no setór produtivu seluk.
4. Revizaun ba dokumentu sira, pergunta xave ba produsaun PSA no TV Magazine tenke hetan aprovasaun husi Oxfam antes hahú halo produsaun
5. Halo PSA no TV Magazine sira ba ne’ebé Oxfam identifika no deside
6. Ezbosu filme hirak ne’e sei aprezenta ba Oxfam no reprezentante husu grupu hirak ne’e hodi haree hamutuk, fó komentáriu no hadi’ak
7. Hatama produsaun ikus ba Oxfam ba publikasaun iha kanál televizaun nasionál.

Tempu no data

1. Atividade ne’e sei hahú iha fulan Jullu -Agostu 2021
2. Prepara relatóriu produsaun filme Agostu 2021
3. Ezbosu filme submete ba Oxfam iha 13 Agostu 2021
4. Relatóriu final 20 Agostu 2021
5. Deadline hatama proposta ba Oxfam loron 23 Jullu 2021

Outputs:

1. Produz Public Service Announcement (PSA) tolu ho Mensajen xave ba kampaña no advokasia kona ba oinsá uza fundu petróleu ho sustentavel no fó importánsia ba investe iha setór Agrikultura, no diversifikasaun ekonomia reprezenta husi toos na’in ka agrikultór ida, grupu feto, grupu joven no reprezentante Sosiedade Sivíl.
2. Produz TV Magazine tolu ho durasaun minutu 5, ema husi Governu, Parlamentu Nasionál, Organizasaun sosiedade sivíl, akadémiku, inklui mós ema ho defisiénsia, feto agrikultór ida kona ba sira nia esperiénsia liga ho investimentu FP iha setór agrikultura no setór produtivu seluk no saida governu tenke halo atu garante sustentablidade FP.
3. Halo editing ba PSA no TV magazine (6)
4. Hakerek Script ba video 6 kona ba istória husi ema ne’ebé identifikadu.
5. Kopia file iha high resolution ba video (final edits and unedited) kopia filme final ho file ki’ik natoon ba Facebook no photo tuir Oxfam nia polítika kona ba file name no detalla dokumentasaun ba file ida-idak (prienxe formuláriu tuir Oxfam ninian)

Orsamentu
Kona ba akomodasaun, perdiem, kustu komunikasaun, fee konsultór, no gastu seluk konsultór/a tenke inkorpora ona iha planu orsamentu ne’ebé aprezenta husi konsultór/a. Gastu seluk inklui taxa ne’e responsabilidade konsultór nian.

Esperiénsia konsultór ne’ebé mak presiza:

• Esperiénsia halo ona produsaun filme ho kualidade di’ak no publika iha Televizaun sira iha TL, Sosiál media (Youtube)
• Komprende di’ak asuntu agrikultura inkluzivu no diversifikasaun ekonomia
• Iha background iha area komunikasaun sosiál
• Esperiénsia iha produsaun filme dokumentasaun no videographer iha organizasaun no ajénsia international maximum tinan 5
• Esperiénsia nu’udar photographer maximum tinan 5
• Iha abilidade iha editing film no sound mixing
• Abilidade no kapasidade iha hakerek istória
• Iha ezemplu portfolio photo, istória no filme ba Oxfam

Oportunidade ne’e oferese ba ema indivíduu ka kompañia ne’ebé halo produsaun filme. Ami sei loke hahú husi publikasaun TOR ne’e, 21-26 Jullu 2021 hahú husi horas 8:00 - 17:00 Otl.

Ba sira ne’ebé iha interese bele manda CV no planu produsaun filme nian no orsamentu mai ami iha diresaun email ka atu hatene informasaun liu-tan bele kontaktu ho Adilson da Costa Junior, adilsond@oxfam.org.au, no telefone: 78318797

Please share the invoice with us to proceed with the payment.

Best wishes

Adilson da Costa Junior |Strategic and Engagement Lead|Oxfam - Timor-Leste Country Programme
Avenida: Hudi Laran | Aimutin | Dili – Timor Leste Tel: +670 3312-605 |Mob: +670 78318797 |WhatsApp: +67078318797